Prokurori i Përgjithshëm: Prokuroria në Shqipëri nuk ka në zhvillim asnjë hetim mbi veprimet e Policisë Italiane
Prokurori i Përgjithshëm Adriatik Llalla, u takua sot me ambasadorin Italian në Tiranë, Alberto Cutillo. Pas takimit, prokuroria ka sqaruar përmes një deklarate për mediat se kryeprokurori ka siguruar ambasadorin Italian se prokuroria në Shqipëri nuk ka në zhvillim asnjë hetim mbi veprimet e Policisë Italiane, pra as në hetimin që Prokuroria e Tiranës po zhvillon këto kohë lidhur me ekzistencën e një pajisje të dyshuar përgjuese.
Në një komunikatë për mediat, të Prokurorisë thuhet se në fokus të bisedës ishte forcimi i bashkëpunimit ndërmjet strukturave ligjzbatuese në të dy vendet tona.
“Në takim u vlerësua bashkëpunimi shumë i ngushtë, efiçent dhe i suksesshëm ndërmjet autoriteteve shqiptare dhe italiane, në drejtim të hetimeve të përbashkëta në luftën kundër krimit të organizuar, si edhe rolin tepër koordinues të Ambasadës italiane në Tiranë në veprimet konkrete”, thuhet ndër të tjera në njoftim.
Prokurori i Përgjithshëm vlerësoi rolin e forcave të sigurisë italiane në shkëmbimin e informacionit me autoritetet shqiptare për evidentimin, zbulimin dhe vendosjen para drejtësisë të personave të përfshirë në veprimtari të ndryshme kriminale në të dy vendet tona”, theksohet në deklaratën e prokurorisë.
