2 prokurorë, 3 oficerë të Policisë Gjyqësore dhe një specialist i Teknologjisë së Informacionit, verifikojnë pastërtinë e zyrtarëve
Sektori i Verifikimit të Integritetit të Zyrtarëve është struktura e re me të cilën nis zbatimi i ligjit të dekriminalizimit. Prokurori i Përgjitshëm, Adriatik Llalla firmosi sot urdhërin për krijimin e kësaj strukture të posaçme për zbatimin e ligjit të dekriminalizimit.
Pjesë e saj do të jenë 2 prokurorë, 3 oficerë të Policisë Gjyqësore dhe një specialist i Teknologjisë së Informacionit. Ligji për dekriminalizimin përcakton organin e Prokurorisë si institucioni përgjegjës për verifikimin e integritetit të zyrtarëve në të gjithë administratën publike. Prokuroria e Përgjithshme njoftoi zyrtarisht miratimin e kësaj strukture dhe detajet e funsksionimit të saj.
“Prokurori i Përgjithshëm urdhëron Krijimin e regjistrit për regjistrimin e kërkesave për verifikim dhe krijimin e regjistrit për regjistrimin e formularëve të vetëdeklarimit; si edhe, – Krijimin e një sistemi elektronik për regjistrimin, ruajtjen dhe dokumentimin e kërkesave për verifikim, të dhënave, akteve apo fakteve të administruara, rezultatet e verifikimit dhe të dhënave të grumbulluara. Në Urdhërin e Prokurorit të Përgjithshëm përcaktohen edhe detyrimet e punonjësve që do të jenë pjesë e Sektorit të Verifikimit. Sipas këtij akti, të dhënat dhe informacionet e grumbulluara në këtë proces trajtohen në përputhje me ligjin nr.138/2015, me Vendimin e Kuvendit nr. 17 datë 04.03.2016, si edhe me legjislacionin në fuqi për mbrojtjen e të dhënave personale.
Po ashtu, çdo person që hyn, transmeton, përdor ose përpunon të dhënat e sistemit elektronik në kundërshtim me rregullat teknike dhe legjislacionin në fuqi, ngarkohet sipas rastit me përgjegjësi administrative ose penale”, sqaron prokuroria e Përgjithshme.
