Gashi mbetet në Amerikë, afrohen Manaj, Grezda, Latifi dhe Llullaku, ndërsa Strakosha do të jetë pikë fikse, menjëherë sa të përfundojë aventura e Shpresave
Në prag të ndeshjes ndaj Lihtenshteinit, trajneri De Biazi ka prezantuar skuadrën që do të grumbullohet për transfertën e së premtes ndaj skuadrës modeste, por edhe për për ndeshjen tri ditë më pas, ndaj Spanjës në “Loro Boriçi”. Ndërkohë tekniku ka bërë edhe disa ndryshime në listën e tij dhe ajo që bie më shumë në sy është mungesa e Gashit, por edhe afrimi i disa futbollistëve të rinj. “Kam folur këto ditë me Gashin dhe ai ishte i gatshëm të vinte për këto ndeshje, por vendosa të bëja zgjedhje të tjera. Kam afruar të rinj si Manaj, Grezda e Latifi, ndërsa Strakosha do të luajë në ndeshjen e rradhës me përfaqësuesen Shpresa, më pas do të jetë një pikë fikse e Kombëtares”, tha trajneri përballë gazetarëve. Ndërkohë që skuadrës i është afruar sërish Llullaku, pas grumbullimit në miqësoren ndaj Francës. “Ai po kalon një formë shumë të mirë dhe po shënon gola, por e morëm jo vetëm për formën që po kalon, por edhe sepse është i bindur dhe sakrifikon për ekipin”, ka përfunduar trajneri De Biazi.
