Dy nipërit e deputetit socialist Arben Ndoka janë shpallur në kërkim nga policia pasi kanë rrahur ish deputetin e PS, Agustin Marku.
Ngjarja ka ndodhur në një kafene në lagjen “Skënderbeg” në Lezhë. Sipas njoftimit të policisë kanë qenë dy të rinj, K.Ndoka 21 vjeç dhe S.Ndoka 18 vjeç që kanë rrahur Agustin Markun me detyrë N/Kryetar i Këshillit të Qarkut Lezhë.
Marku nuk ka bërë kallëzim për rrahjen, megjithëse ka përfunduar në gjendje të rëndë në spital. Ish deputeti socialist konfirmon incidentin, por thotë se nuk ka dijeni për personat që e kanë bërë dhe për motivet.
Njoftimi i policisë
“Më datë 20.02.2017, u referuan materialet hetimore në Prokurorinë e Rrethit Gjyqësor Lezhë dhe punohet për kapjen e shtetasve: K.N. 21 vjeç dhe S.N. 18 vjeç, të dy banues në Lezhë. Këta 2 shtetas dyshohet se rreth orës 13:30, në lagjen “Skënderbeg” të qytetit Lezhë, para një lokali, për motive të dobëta kanë goditur me mjete të forta, shtetasin A.M. 54 vjeç, banues në Lezhë, me detyrë N/Kryetar i Këshillit të Qarkut Lezhë.
Pas ndihmës së nevojshme mjekësore në Spitalin Rajonal Lezhë, shtetasi A.M. ndodhet jashtë rrezikut për jetën. Materialet procedurale për dy vëllezërit u referuan Prokurorisë së Rrethit Gjyqësor Lezhë për veprat penale “Kanosja”, “Dëmtime të tjera me dashje” dhe “Goditje për shkak të detyrës”.
