Kryeministri Edi Rama është takuar sot me disa nxënës në Bathore, në kuadër të fushatës së konsultimeve publike.
Mes të tjerash kreu i qeverisë foli edhe largimin e të rinjve nga vendi duke theksuar se ky është një fenomen që nuk ndodh vetëm në Shqipëri.
Sipas tij kjo nuk lidhet medoemos me situatën ekonomike por edhe me globalizmin dhe shpejtësinë e lidhjes vendeve përmes internetit. Rama mori shembullin e Portugalisë duke theksuar se pavarësisht suksesit ekonomik nuk ia ka dalë të rinjtë të largohen nga vendi qoftë me pagesa apo bonuse.
“Ne i shohim vendet e tjera me admirim dhe duam të bëhemi si ata. Kur gjykojmë për veten tonë ne harrojmë se nga vijnë ata. Me të drejtë nuk kemi durim se njeriu një jetë ka. Dhe një 20-vjeçar që jeton në situatë të vështirë, thotë ça do bëj do pres 20 vjet kur e kam Gjermaninë dy orë larg.
Është në të drejtën e vet ta mendojë këtë gjë. Këtë që ne diskutojmë sot e kanë pasur problem të gjitha vendet që dolën nga komunizmi dhe sot e kanë problem vende që janë në BE.
Portugalia p.sh. ka pasur sukses ekonomik dhe prapë njerëzit ikin. Është bërë shumë shqetësuese derisa qeveria ka futur disa masa që ne nuk i bëjmë dot. Me pagesa dhe bonuse, por tendenca nuk po ndryshon. Jetojmë në kohën e shpejtësisë së komunikimit. E dini problemin më të madh nga Roma deri në Jug. Janë mjekët. Italia që është fuqia e 5 ekonomike e botës. Shqipëria ka shumë gjëra për të cilat duhet shumë kohë por janë disa gjëra që mund t’i bëjë shumë shpejt përmes teknologjisë”, -deklaroi Rama.
