Kreu i ALUIZNI-t, Artan Lame në një konferencë për shtyp u kërkoi qytetarëve që jetojnë në Shqipëri t’u japin mundësi emgrantëve të mbyllin proçeduarat e legalizimit të pronave të tyre duke u treguar mirëkuptues për rradhët e gjata. Lame u shpreh se janë krijuar edhe sportele shtesë që t’u shërbehet sa më shpejt.
Sa i përket legalizimeve të banesave, Lame bëri me dije se për muajin korrik në rang Republike janë legalizuar 5505, ndërsa për muajin qershor janë kryer rreth 4 mijë legalizime. Ai u shpreh se proçesi i legalizimeve në Shqipëri nuk do të përfundojë asnjëherë pasi gjithmonë do të ketë disa që kanë nevojë për t’u legalizuar.
Deklarata e Lames:”Ju bëj thirrje të gjithë emigrantëve që të përfitojnë nga kjo periudhë për të mbyllur procedurat e legalizimit të tyre. Të jenë të bindur që personelin e ALUIZN-t do ta kenë në dispozicion gjatë gjithë kësaj periudhe. Gjithashtu, për shkak të mbingarkesës në këto momente, do t’u kërkoja mirëkuptimin e të gjithë qytetarëve të tjerë që t’i hapin rrugë emigrantëve në këtë moment piku, moment ky që përfundon pas gjysmës së parë të shtatorit. Ndaj, le t’u gjendemi pranë në këtë moment.
Ne kemi marrë masa pranë sporteleve tona për këtë masë të madhe të qytetarëve tanë, që gjatë qëndrimit të tyre të mund të kryejnë procedurat e legalizimit të shtëpive të tyre. Për të gjithë rastet e tjera rutinë, qytetarët ftohen të presin me qetësi ekipet tona. Le të koordinohemi së bashku për ta çuar procesin më përpara.
Është realisht krenari dhe gati në kufijtë e të pabesueshmes një shifër e tillë. Për sa i përket vijimit të procesit, do të thoja që qarqet që do të jenë të parat që do ta mbyllin procesin e legalizimit, me shumë gjasa këtë garë mund ta fitojë Qarku i Dibrës dhe Qarku i Kukësit dhe më pas Qarku i Fierit. Janë tre qarqet që janë më pranë mbylljes.
Procesi i legalizimit në Shqipëri nuk ka për të mbaruar asnjëherë. Gjithmonë në këtë vend do të ketë njerëz që kanë nevojë për t’u legalizuar. Për fat të keq, edhe sot që ne flasim, në vende të caktuara po ndërtohet pa leje dhe një ditë edhe këta do të trokasin në shtetin shqiptar për të kërkuar legalizimin.
Legalizimi i zonave të mëdha rreth qyteteve mbyllet në këtë legjislaturë, që do të thotë, Bathorja, Këneta e Durrësit, rrethinat e Shkodrës, Kamza, Paskuqani, pra gjithë këto zona mbyllen në këtë mandat.”
