Ditën e sotme kryetarja e Kuvendit, Lindita Nikolla, ka zhvilluar një takim me Ambasadoren e ShBA, Yuri Kim. Me anë të një njoftimi për mediat, Kuvendi ka zbardhur takimin ku thuhet se u bisedua mbi rolin edhe kontributin e rëndësishëm të Kuvendit të Shqipërisë nën lidershipin e Kryetares së Kuvendit, Lindita Nikolla. Gjithashtu është vënë theksi në avancimin dhe thellimin e reformave të rëndësishme, jetike për jetën e vendit, fuqizimin e shtetit të së drejtës, konsolidimin e institucioneve demokratike dhe luftën kundër korrupsionit dhe krimit të organizuar.
Gjithashtu vëmendje do t’u kushtohet edhe avancimit të procesit të vetting-ut dhe ndërtimin e një sistemi drejtësie të ndershëm, në shërbim të qytetarëve; bashkëpunimin e suksesshëm midis ShBA dhe Shqipërisë në kuadrin e Këshillit të Sigurimit të OKB-së dhe NATO-s për dënimin e agresionit ushtarak të Rusisë dhe mbështetjen e Ukrainës. Në takim është diskutuar edhe bashkëpunimin dypalësh për rritjen e sigurisë dhe forcimin e paqes në rajon e më gjerë. Më tej në njoftim thuhet se do të rritet bashkëpunimi midis Kuvendit të Shqipërisë dhe Kongresit Amerikan, edhe në kuadrin e 100-vjetorit të vendosjes së marrëdhënieve diplomatike midis të dy vendeve.
Në fokus të takimit mes tyre ishte dhe nxitja dhe mbështetjen e investimeve amerikane në Shqipëri si dhe çështje të tjera të bashkëpunimit dypalësh.
