Kryetari i Partisë së Lirisë Ilir Meta ka treguar kushtet që ka për të bërë koalicion me partitë në vazhdim. Gjatë një takimi me strukturat e PL-së në Vlorë, Meta ka deklaruar se kushti për koalicion do të jetë referendimi dhe jo numri i bashkive që do të marrin.
“Jemi njerëz që meritojmë të jetojmë të lirë dhe jo të jetojmë për një copë bukë dhe lëmoshë. Duhet të tregojmë se është vendi i të gjithëve dhe jo i atyre që shtypin të tjerët. Kjo situatë ku jemi është për shkak të opozitës dhe braktisjes së institucioneve. Ju i dini këto që kanë ndodhur, por janë një mësim i madh për të ndezur motorët dhe për të mbledhur njerëzit e ndershëm rreth vetes, pasi vendi është në rrezik. Nëse largohen dhe 100 mijë shqiptarë do të jetë katastrofale. Angazhimi ynë për referendumin synon këtë gjë, që të rikthejë kontrollin e popullit ndaj institucioneve. Populli e vendosi në 98-ën këtë por ata bënë një ligj që ja mohon të drejtën e referendumit. Kushti jonë në çdo koalicion në të ardhmen do të jetë referndumi dhe jo duam kaq dhe aq bashki. Populli duhet ta zbatojë referndumin që të marrë kontrollin e vendit të vet, pasi janë bërë të huaj në vendin e tyre. Kaq kërkon Partia e Lirisë, të marrë kontrollin populli. Kam besim tek ju dhe te të gjithë vlonjatët, mos prisni të na qajnë hallin SHBA-ja dhe Gjermania,” tha Meta.
