Nga skuadrat që do të kemi në grup gjatë finaleve të Francës, Zvicra e “kushërinjve” është skuadra që po kalon momentin më të keq. Helvetët janë mundur dje në shtëpi nga Bosnja, me dy gola të deleguar nga Roma. Fillimisht është Xheko me një diagonal nga e djathta që e dërgon topin në rrjetë, pas një asisti të Luliç në të 14’. Ndërsa në të 57’, Miralem Pjaniç nxorri një kryevepër nga repertori i tij, pas një goditje dënimi. Tek Zvicra vetëm Granit Xhaka i luajti të 90 minutat, ndërsa Kasami dhe Mehmedi e filluan si titullarë, ndërsa më pas u zëvendësuan. Disa minuta kishte edhe për Tarashajn, Xhemaili nuk u preferua asnjë minutë nga trajneri Petkoviç, kurse Berhami dhe Xherdan Shaqiri nuk ishin as në stol.
Ndërkohë që Franca ka mundur 4-2 Rusinë në një ndeshje shumë të luftuar. N’Golo ka hapur serinë e golave, duke festuar kështu 25 vjetorin e lindjes nëntë minuta pas fillimit të takimit. Në të 38’ është Ginjak që dyfishon rezultatin, por gjithçka erdhi edhe për meritë të sulmuesit të Atletiko Madrid, Grizman, i cili ekzekutoi në mënyrën më të mirë të mundëshme një goditje dënimi. Në pjesën e dytë, rusët kthehen në lojë me Kokorin (56’), por francezët shënojnë përsëri në të 64’ me Paje, një tjetër futbollist që fesoi ditëlindjen e 29-të. Juri Zhirkov i bën sërish rusët të shpresojnë, por 14 minuta nga koha e rregullt Koman mbyll gjithçka për francezët, të cilët do të kthehen përsëri në “Stade de France” pas 73 ditësh, kur do të luajnë ndeshjen e hapjes së Euro 2016 kundër Rumanisë.
