Nga Elona Caslli
Në jetë, njeriu para se të jetë zot i një shtëpie, zot i një pune, zot i një pozicioni, duhet të jetë zot i viteve që ka jetuar mbi tokë dhe ta përfaqësojë denjësisht moshën e tij. Me kalimin e viteve fjala duhet të rrallohet dhe pesha e saj duhet të shtohet.
Teksa u përballa me statusin e zonjës në fjalë e pata vështirë të dalloja, nëse ky status ishte shkruar nga një adoleshente e turbulluar apo nga një zonjë me karrierë politike, e cila prej dekadash e ka kaluar fazën e adoleshencës.
Zonja në fjalë tetë muaj para zgjedhjeve na servir si logjikë të shëndetshme hipotezën se populli me protesta dhe me votë do të zhdukë tre kryetarët e partive në vend dhe do të çlirohet përgjithmonë prej tyre.
Kjo hipotezë i falet një adoleshenteje në politikë, por kurrsesi një gruaje me përvojë në politikë, e cila e njeh nga afër dhe e di fort mirë domethënien dhe strukturën e fjalës “parti”.
Nuk e di se cilat kanë qenë arsyet që e kanë shtyrë zonjën Topalli të na servirë këtë utopi si zgjidhje, por pa më të voglin dyshim, mund të thuhet se këto arsye nuk e kanë prejardhjen nga logjika apo nga pjekuria e mendimit.
Post Scriptum – Të identifikosh një problem, pa dhënë një zgjidhje të prekshme dhe të zbatueshme për problemin, do të thotë ta thellosh problemin dhe ta zgjasësh jetëgjatësinë e tij.
