Eshtë hedhur sot shorti që përcakton çiftet gjysmëfinaliste të Kupës së Shqipërisë dhe në letër duhet se goglat kanë favorizuar skuadrat që po kalojnë momentet më të mira në këtë fazë të sezonit. Kështu, Flamurtari do të ndeshet me Kukësin dhe flitet për dy ekipe që kanë synime diametralisht të kundërta në kampionat. Vlonjatët nuk po dinë të reagojnë dhe vazhdojnë të jenë të rrezikuar për të rënë një kategori më poshtë, ndërsa Kukësi i Duros po i afrohet imazhit të dy viteve të fundit, kur ka qenë një nga skuadrat më të denja për të konkuruar kampionët e skënderbeut. Në katër ndeshjet e fundit, verilindorët kanë arritur katër fitore rresht dhe një barazim të dielën në transferën e “Selman Stërmasit” ndaj Tiranës, një takim ky ku i mongoi edhe fati, pasi meritonin më shumë. Veç kësaj, kuksianët kanë arritur në dy finalet e fundit, por nuk kanë arritur ta çojnë në shtëpi titullin. Megjithatë, Flamurtari u riformatua në janar, duke filluar që nga pankina me trajnerin Ramadani dhe përfshi një pjesë të mirë të titullarëve të tanishëm, pikërisht për hir të këtij kompeticioni, fitimi i të cilit të çon direkt në Europa League.
Çefti i dytë do të jetë Laçi – Skënderbeu. Kurbinasit janë fituesit në fuqi e këtij trofeu, pas finales me Kukësin një vit më parë, por tani janë mbërthyer nga një krizë totale, fillimisht me transferimin e Xhejms tek Skënderbeu dhe në vazhdim nga një çoroditje totale e grupit. Së fundi është larguar edhe trajneri Stavri Nica, i cili sipas një deklarate të fundit bëri të ditur që kjo skuadër është e pashpresë. Megjithatë, ata mbeten specialistë të këtij evenimenti, fitues dy herë në katër vitet e fundit. Ndërsa kampionëve të Skënderbeut, pikërisht Kupa e Shqipërisë është kurora që i mungon në këtë periudhë të jashtëzakonshme 5-vjeçare, ku kanë dominuar futbollin e vendit.
Kupa e Shqipërisë (faza gjysmëfinale)
Flamurtari – Kukësi
Laçi – Skënderbeu
(Ndeshjet e para do të luhen në datën 6 prill, ndërsa ato të kthimit më 20 prill)
