Kreu i qeverisë Edi Rama nga salla e Këshillit Bashkiak të kryeqytetit ka komentuar edhe çështjen e ndërtimeve në Tiranë përfshirë kullat shumëkatëshe, për të cilat tha se janë të mirëseardhura për Tiranën moderne dhe europiane.
Rama tha gjithashtu duke iu referuar katër kullave që janë ndërtuar apo që janë në ndërtim në kryeqytet, se fjala “kullë” është bërë si bukë, ndërsa fjala “PPP” është bërë si djathë.
“Oligarkët, të cilët akuzohen gjithë ditën paguajnë sot më shumë taksa se sa paguanin më parë. Janë dhënë 1000 kredi të buta në qeverisjen tonë për strehim, krahasuar me qeverisjen e mëparshëm. 120 banesa për komunitetin rom krahasuar me zero në qeverisjen e tyre. Shifrat flasin vetë, faktet flasin vetë, por ja që duhet të flasim edhe ne që balta dhe shpifja të mos i mbulojë ato që janë bërë kanal në kanal e portal në portal.
Meraku se shpifjet kthehen në kulla nuk është i pavend. Fjala “kullë” është bërë si bukë dhe fjala “PPP” është bërë si djathë. Katër kulla, katër milionë akuza dhe katër milliard llafe për kullëzimin, po a nuk janë këto katër ndërtesa dinjitoze për Tiranën? Padyshim që janë dhe çdo kullë tjetër që do t’i pasojë, jo vetëm që nuk do të jetë motiv keqardhje, por motiv mirëseardhjeje për Tiranën moderne dhe europiane.”, tha Rama
