Deputetja demokrate, Albana Vokshi, i bëri thirrje SPAK të hetojë vonesën e policisë në ekzekutimin e urdhër-arrestit të lëshuar nga Prokuroria e Posaçme.
Në një dalje për mediat nga selia blu, Vokshi hodhi dyshime se vonesa lidhet me negociatat e Ramës dhe ministrave me Bllakon për të mos nxjerrë emrat e tyre në aferën qindramilion euro.
“Fshehja dhe dorëzimi i kontrolluar i Alqi Bllakos tregon se Rama dhe vartësit e tij në polici janë gati të bëjnë gjithçka që të pengojnë drejtësinë. Kjo tregon frikën që mund ti bëjnë bashkëpunëtorët Edi Ramës dhe ministrave të tij.Ai ishte në negociata me Ramën dhe ministrat e zhytur në këtë aferë. Askush se di ku ishte Alqi Bllako për 12 orë. Sipas informacioneve, atij i është kërkuar të mbyllë gojën dhe të mos tregojë shefat e përfshirë në skandalin e qindra milionë eurove. Qytetarët e kanë të qartë që Bllako nuk është as koka dhe as bishti i këtij korrupsioni gjigant. Ai është vetëm një hallkë që duhet të vuajë pasojat e veprimeve të tij kriminale. Por a do të jetë mundësi Alqi Bllako të flasë lirshëm, çfarë porosish, urdhrash, kërcënimesh ka marrë në ato që policia po e kërkonte në drejtim të paditur? SPAK duhet ta hetojë edhe këtë çështje, të hetojë këtë skandal me policinë politike të shtetit. Alqi Bllako sot ka mundësinë ti bëjë një nder vetes, një nder Shqipërisë, të hetojë gjithë të vërtetën”, shprehet Vokshi.
