Kryeministri Edi Rama ka ironizuar kryebashkiaken e Shkodrës Voltana Ademi me anë të një foto të publikuar të urës së vjetër mbi lumin Buna, e cila është në gjendje të amortizuar.
Ademi, po në të njëjtën mënyrë i është përgjigj duke publikuar shkresën zyrtare që i kishte drejtuar Ministrisë së Mbrojtjes në korrik të vitit 2016, ku i kërkonte bashkëpunim për restaurimin e urës, por nuk kishte marrë asnjë përgjigje.
Këtë status të kryebashkiakes, kryeministri Rama e ka ripublikuar në faqen e tij duke ju përgjigjur Ademit e treguar asaj mbetjet urbane të papastruara pranë kësaj ure.
Po përmes rrjeteve sociale ka mbërritur përgjigja e Kryeministrit Rama:
Ja edhe një përgjigje e mundshme imja për zonjën kryetare: Voltana, ti në Bashkinë e Shkodrës nuk bën asgjë më shumë se sa ç’bëri Lulëzimi në Bashkinë e Tiranës, dmth vetëm fle, dhe në jetë nuk bën asgjë më shumë se sa ç’bën Lulëzimi në çadër, dmth flet po nuk mban përgjegjësi për çfarë thua! Po njësoj si Lulëzimi, ti i jep shumë rëndësi vetes duke menduar se unë jam kundërshtari yt.
Por në fakt unë jam thjesht kundërshtari i dembelëve që u punon gjuha jo truri, i parazitëve që u punon goja jo zemra, i karagjozëve që u punon djallëzia jo qytetaria. Nuk e di nëse ti hyn në këto kategori, që kanë populluar politikën shqiptare prej çerekshekulli e këtej, sepse realisht, s’të kam parë ndonjëherë me këtë sy. Por di me siguri që mes Shkodrës e teje, ka po aq lidhje sa ç’kishte mes Lulëzimit e Tiranës.
Kështu që kur ti flet, për si nuk e shkatërroi dot komunizmi Shkodrën, mua thjesht më vjen keq për si po katandiset Shkodra, teksa ti fle dhe sheh ëndrra sikur unë jam kundërshtari yt, meqë ti qenke antikomuniste.
Ndërkohë unë i shkreti do vazhdoj thjesht të mundohem të të zgjoj nga gjumi, sa herë flas për Shkodrën, sepse më dhimbset Shkodra, jo se dua të hakmerrem për ëndrrat e tua të rehatshme. Po që të mos e zgjas se do jesh duke fjetur, fatmirësisht kam shahit disa kolege të tutë, demokratë që nuk ngjajnë as me Lulëzimin as me ty, nga Tropoja në Përmet! Ata mund të të dëshmojnë, se mua më mjaftojnë projektet dhe pasioni i kryebashkiakëve për qytetin, për të bashkëpunuar me bashkitë pa dallim, e për ta çuar erën e Rilindjes Urbane nga lart në Veri deri poshtë në Jug?
Po ti fli, fli e mos e vrit mendjen hiç që Shkodra nuk është repart ushtarak dhe Ura e Bunës është simbol i qytetit jo aset i ushtrisë? E ashtu në gjumë, më jep si gjithmonë përgjigjen “antikomuniste” të radhës, vetëm aman të keqen, mirë që gramatikën e drejtshkrimin në tërësi nuk i njeh, po kujdes, të paktën fjalën konkuro mos e shkruaj me “rr” se kuptohet që je duke gërrhitur.
E meqë ra fjala po plehrat nën Urën e Bunës kush i ka, ushtria apo policia?
