Pasi Italia është vendi më i goditur nga vdekjet në Europë për shkak të pandemisë së koronavirusit, kryeministri Giuseppe Conte theksoi se situata është afër pikut.
Teksa u ndal tek kufizimet e qeverisë, ai tha se këto rregulla janë të përkohshme dhe se masat do të lehtësohen.
“Tashmë jemi në fazën më mprehtë të të urgjencës. Është shumë e vështirë që të bësh parashikime. Ekspertët janë ende të kujdesshëm, por është e arsyeshme të mendosh që jemi afër pikut. Të shtunën ne tejkaluam 10,000 viktima dhe kjo na lëndon shumë dhe duhet të paralajmërojë bashkësinë ndërkombëtare.”, -kështu deklaroi Conte në një intervistë për gazetën spanjolle ‘El Pais’.
Për ata që e pyesin nëse bllokimi i aktiviteteve të prodhimit do të zgjasë shumë, Conte përgjigjet: “Jo, është një masë shumë e ashpër nga pikëpamja ekonomike. Ishte masa e fundit që kemi marrë dhe nuk mund të vazhdojë shumë gjatë. Për shkollat dhe universitetet, nga ana tjetër, mund të bëhen ndryshime në mënyrë që studentët të mos humbasin vitin apo provimin”.
