Kryetarja e LSI-së, Monika Kryemadhi ishte e pranishme në një aktivitet të të rinjve të LSI, ku u prezantua nisma për Ekipin e Gjeneratës për Ndryshim, GEN. Gjatë fjalës së saj, Kryemadhi foli për përfshirjen e të rinjtë në politikë, për të cilën theksoi se është e kriminalizuar.
Sipas Kryemadhit, vendi ka nevojë për një parlament të vërtetë dhe jo teatër ku certifikohen aferat korruptive nga dy persona, duke shigjetuar kështu kryeministrin Edi Rama dhe kreun e PD-së, Lulzim Basha.
“Kemi nevojë për një parlament të vërtetë dhe jo teatër, që certifikon aferat korruptive midis dy personave që mbajnë peng sot Shqipërinë”, tha Kryemadhi.
Ndër të tjera, Kryemadhit duket se nuk i ka dalë ende inatin me kreun demokrat, Lulzim Basha pasi e fajësoi atë për humbjen në 25 prill, ndërsa e cilësoi si një armik.
“Kur më erdhi njoftimi për këtë ide dhe hapa e ndërmarra e kam cilësuar si një nga aktivitet më të rëndësishme në këto dy dekada të të gjithë jetës së LSI. Ka ardhur si një iniciativë e të rinjve. Ne vijmë sot pas zgjedhjeve të 25 prillit ku kontributi juaj ka qenë I jashtëzakonshëm përballë sfidave me bandat, me pabesinë. Me një partneritet që e kishin armik në krah. Votat janë mbështetje për vetë vizionin tuaj dhe pasha elektorale nuk u përkthye në mbështetje. Kemi dashur të realizojmë disa ndryshime për të siguruar sovranitetin përmes votës. Duke filluar me ndryshimet rrënjësore për shqiptarët që jetojnë jashtë Shqipërisë. Që prej ditës së parë e kemi pjesë të programit tonë”, tha Kryemadhi.
Kreu i LSI tha se pas zgjedhjeve parlamentare të 25 prillit do kërkonin ndryshime legjislative në mënyrë që sipas saj pushteti t’i kalojë parlamentit.
