Presidenti i vendit, Ilir Meta ka pritur në një takim ministrin e Punëve të Jashtme dhe Tregtisë të Hungarisë, Peter Szijarto.
Meta ka vlerësuar marrëdhëniet e mira mes dy vendeve, si dhe mbështetjen që tregoi Hungaria në rrugën e Shqipërisë drejt Bashkimit Europian.
Referuar krizës politike në vend, Meta është shprehur se çdo veprim drejt rrugës së paligjshmërisë dhe të konfliktit e nxjerr Shqipërinë nga perspektiva e saj evropiane.
“Vlerësoj marrëdhëniet tradicionalisht shumë të mira ndërmjet Shqipërisë dhe Hungarisë. Çmoj mbështetjen e sinqertë të Hungarisë në procesin e integrimit evropian. Me rëndësi zbatimi i të gjitha prioriteteve që kushtëzojnë një vendim pozitiv të Këshillit Evropian.
Shqipëria të rikthehet në normalitetin e respektimit të shtetit ligjor. Çdo veprim drejt rrugës së paligjshmërisë dhe të konfliktit, e nxjerr Shqipërinë nga perspektiva e saj evropiane. Aktorët e brendshëm ose të jashtëm që i kontribuojnë këtij skenari, do të mbajnë përgjegjësi përpara popullit shqiptar”, është shprehur presidenti Meta.
