Prodhimi në 3 mujorin e parë 2016 ra me 2800 fuçi në ditë
Bankers Petroleum ka ulur ndjeshëm nxjerrjen e naftës gjatë tre muajve të parë të 2016. Sipas një njoftimi të vetë kompanisë prodhimi mesatar ditor ka rënë në rreth 17 mijë fuçi nga 19,800 që ka qenë një vit më parë. Prodhimi i naftës ra me mbi 12 për qind si pasojë e ndërprerjes së investimeve për shpimin e puseve të reja, masë që u mor dhjetorin e kaluar për shkak të çmimeve shumë të ulëta të shitjes së naftës në tregun ndërkombëtar.
“Çmimi mesatar i naftës së Bankers ishte mesatarisht 21,07 dollarë për fuçi duke përbërë 62% të Brentit prej 33,89 dollarë për fuçi, kundrejt një mesatareje prej 33.62 dollarë për fuci që ishte në tremujorin e katërt 2015,” njofton kompania Bankers.
Një vit më parë, çmimi i shitjes së naftës së Bankers qe 39.6 dollarë për fuçi. Rënia e çmimit mesatar prej 46 për qind i shtohet rënies së prodhimit. “Si pasojë e çmimit të ulët të naftës, Bankers ka vendosur të shtyjë aktivitetin e shpimit në fillim të vitit me qëllim mbrojtjen e bilancit financiar të kompanisë. Shpimi do të rifillojë sapo çmimet e naftës të përmirësohen,” thuhet më tej në deklaratë.
