Nuk ishte përplasje fisesh, por luftë mes bandash kriminale. Tmerri i një nate më parë në Elbasan, ku mu pranë rrugës kombëtare lëshohen mbi 70 fishekë në mes të një lokali mjaft të frekuentuar, u “shit” nga policia për mediat si një “hakmarrje mes dy fiseve”.
Po të shohësh emrat e njerëzve të përfshirë në konfliktin e armatosur ishin individë me mbiemra të ndryshëm. Aq më shumë që kjo pistë në zonën e Elbasanit është e përjashtuar, pasi kemi të bëjmë me një vend ku vrasja për gjakmarrje është thuajse zero.
Ajo që ndodhi në Krastë ishte një përplasje e qartë dhe e egër mes dy bandave nga më të rrezikshmet në vend.
Vetë policia e ka vërtetuar këtë me të dhënat për secilin person të përfshirë në këtë konflikt. Ata rezultojnë të jenë kontigjentë kriminalë nga më të rrezikshmit: trafik droge, prostitucion, vrasje, plagosje dhe krijim bandash të armatosura.
Të gjithë kanë qenë në atë zonë prej kohësh, dhe njëri prej të cilëve është pronari i një nga lokaleve më të njohur të rrugës Elbasan-Librazhd që frekuentohet nga udhëtarët e dëndur që rrahin këtë rrugë për të arritur Pogradecin e Korçën, por edhe Maqedoninë e Greqinë.
Qytetarët e Elbasanit thonë se pjestarët e këtyre bandave kriminale janë pronarë të bisneseve të rëndësishme në Elbasan që nga pika lojërash fati e deri agjenci udhëtimi.
Për ta thuhet gjtihashtu se kanë marrëdhënie të ngushtë edhe me qarqe të politikës.
Njëri prej tyre, Eno Bedalli, sipas gjasave objektivi dhe shënjestra e sulmit të së mërkurës, ishte arrestuar në Itali në vitin 2013 si pjesë e një linje të fuqishme trafiku kokaine.
Një i vrarë tjetër Agron Çapja, ishte arrestuar në vitin 2005, i akuzuar për vrasjen e një sipwrmarrësi dhe është liruar si gjithnjë për mungesë provash.
Ndërkohë policia përdor një frazë cinike “ hakmarrje mes fisesh” që është më cinike se e famshmja pistë e “lehjes së qenit” që iu dha mediave dikur kur u kap grupi i Sokol Koçiut.
Ka që prej fillimit të vitit që krimi ka marrë superxhiro dhe po ndikon në zhvillimet në vend. Vriten në mes të ditës në Vlorë, Durrës, madje duke përdorur edhe uniforma policie. Në Fier terrorizohet qyteti duke masakruar njerëz dhe plagosur kalimtarë.
Prokurori i Përgjithshëm tha vetëm një ditë më parë se “krimi po sfidon shtetin”. Është një situatë dukshme alarmante dhe kërcënuese që trazon jetën normale dhe nuk jep shërbimin e kërkuar për qytetarët. Ndërkohë çdo ditë komisariatet mbushin komunikata për media e formularë me 15 vjeçarë të ndaluar se kanë “kërcënuar rendin publik” dhe ata që vërtetë e kërcënojnë këtë vend, qarkullojnë lirshëm rrugëve të Shqipërisë pa u trazuar nga askush, veçse kur gjejnë belanë me njëri-tjetrin.
Ndërkohë që policia e shtetit që mbahet me taksat e qytetarëve, nuk përmbush as në nivelet më minimale detyrimet e saj ndaj qytetarëve. Për më tepër me gënjeshtra si ajo e mbrëmshmja, “luftë mes fisesh” dëshmon arrogancë të pastër të shtetit ndaj qytetarit!
