Inspektori i Lartë i Drejtësisë, Artur Metani ka paraqitur këtë të enjte raportin vjetor të punës në Kuvend. Gjatë fjalës së tij, Metani u shpreh se gjatë vitit 2021, u morën 22 vendime për fillimin e hetimit disiplinor për 31 magjistratë. Ai theksoi se 11 gjyqtarë dhe 6 prokurorë janë proceduar me masa disiplinore, deri në shkarkim nga detyra.
“Gjatë vitit 2021 janë marrë 22 vendime për fillimin e hetimit disiplinor për 31 subjekte të hetimit disiplinor, pra 31 magjistratë. 11 gjyqtarë dhe 6 prokurorë janë proceduar me masa disiplinore nga vërejtje deri në shkarkim nga detyra. Për vitin 2022 do vijojmë si prioritet trajtimin e sa më shumë ankesave, sepse për fat të keq, problematikat e 3 dekadave tranzicion reflektohen ende tek drejtësia. Qytetarët duan të shohin ndryshim në gjetjen e të drejtës së tyre përballë problematikave që hasin në sistem, në prokurori apo gjykata” – tha ai.
Metani i bëri thirrje Kuvendit të mbështesë ILD-në në plotësimin me inspektorë magjistratë përmes amendimit të ligjit.
