PDK: Thaçi i ka të sigurta votat, opozita në protest kundër kësaj kandidature
Kuvendi i Kosovës zgjedh sot presidentin ndërkohë që opozita ka nisur protestën kundër zgjedhjes në këtë post të kreut të Partisë Demokratike të Kosovës, Hashim Thaçi. Kryetari i Grupit Parlamentar të PDK-së, Adem Grabovci, ka thënë se e premtja do jetë ditë feste në Kosovë, ndërsa është shprehur i bindur që shefi i tij, Hashim Thaçi, i ka të sigurta votat për president.
Megjithatë përfaqësuesit e koalicionit qeverisës as që e vënë në dyshim çështjen e numrave, edhe pse drejtuesit e Listës Serbe ende nuk kanë dalë me qëndrim përfundimtar.
Pos të gjitha votave të PDK-së, Thaçi pritet t’i marrë edhe votat e Grupit Parlamentar “6+”, shkruan ‘Zëri’. Sipas kësaj gazete, nga LDK-ja mësohet se vetëm Vjosa Osmani dhe Adem Salihaj janë kundër zgjedhjes së Thaçit president.
Në votimin e presidentin nuk do të marrin pjesë deputetët e opozitës si dhe deputeti, Gëzim Kelmendi, i cili është pa grup parlamentar.
Tashmë është paralajmëruar se opozita do të bëjë përpjekje që ta pengojë mbajtjen e seancës dhe gjithashtu do të protestojë jashtë Kuvendit duke ftuar edhe qytetarët që të kundërshtojnë para Kuvendit zgjedhjen e Thaçit president. Ndërkohë shfaqja e sotme e kuvendit të Kosovës ka në sfond kundragazet.
