Një zyrtar i policisë së Drejtorisë së Mitrovicës së Veriut ka rënë në pranga pasi akuzohet se ka kërkuar 25.000 euro nga një qytetar për t’i mundësuar transferimin e pajisjeve të një fabrike nga komuna e Zveçanit në komunën e Graçanicës.
Hetuesit e IPK-së kanë filluar ndërmarrjen e veprimeve hetimore që ka përfshirë grumbullimin e informacioneve shtesë në koordinim të plotë me Prokurorinë Themelore në Mitrovicë për punonjësin D.K., pjesëtar i Policisë së Kosovës.
IPK ka filluar hetimi penal me dyshimin se nga zyrtari policor janë kryer veprat penale keqpërdorim i pozitës apo autoritetit zyrtar dhe marrje e ryshfetit.
Bazuar në Kodin e Procedurës Penale hetuesit e IPK-së kanë siguruar urdhëresën për masa të fshehta nga Gjykata Themelore e Mitrovicës duke përfshirë këtu edhe masat e fshehta të hetimit respektivisht simulimit të veprës penale.
Gjatë arrestimit tek i dyshuari janë gjetur 12.500 euro, të cilat dyshohet që i ka pranuar nga ankuesi. Të dyshuarit të arrestuar nga hetuesit e IPK-së me vendim të prokurorisë i është caktuar masa e ndalimit për 48 orë.
