Partia Demokratike e Kosovës, do të ketë një kryetar të ri. Ai është Kadri Veseli, i cili zëvendëson në këtë post liderin themelues të kësaj partie, Hashim Thaçi. Ky i fundit e la këtë detyrë pasi pak javë më parë u zgjodh president i kosovës.
Veseli ishte i vetëm në garën për postin e kryetarit të PDK-së dhe kishte mbështetjen e Thaçit. Konventa e VII zgjedhore konfirmoi Veselin kryetar të partisë, me një votim pa surpriza.
“Jam shumë falënderues nga ju sot, por në të njëjtën kohë do të jem shumë i drejtpërdrejtë dhe shumë i përgjegjshëm se bashkë me ju na presin edhe shumë punë të përbashkëta për vendin tonë, për qytetarët e vendit tonë, për Partinë Demokratike të Kosovës. Do të fillojmë menjëherë të punojmë. Ku i kemi punët mirë, do të punojmë edhe më mirë. Aty ku kemi ngecje do të përmirësohemi, do t’i pranojmë gabimet dhe do të ecim përpara, në mënyrë që Partinë Demokratike të Kosovës ta forcojmë për shtetin e Kosovës, për qytetarin e Kosovës. Fitore të sigurt”, ka thënë Veseli.
