Nga Asambleja e Zgjeruar e Partisë Socialiste në Korçë, kreu i grupit parlamentar të Partisë Socialiste Taulant Balla ka deklaruar se opozita i frikësohet drejtësisë së re që po lind.
Përmes një postimi në facebook, Balla shkruan se PD-ja dhe LSI-ja vendosën t’i lëshojnë mandatet duke tradhëtuar atë pjesë të popullit që i votoi.
Postimi i plotë
Së bashku me drejtuesin politik të Qarkut Korçë, Niko Peleshi, atë të Qarkut Berat, Blendi Klosi, deputetët Bode dhe Pendavinji dhe Kryetarin e Bashkisë Filo morëm pjesë në Asamblenë e Zgjeruar të Partisë Socialiste Korçë.
Duke marrë fjalën theksova edhe një herë arsyen e braktisjes së mandateve nga opozita e cila i frikësohet Drejtësisë së re që po lind. Pavarësisht përpjekjeve të Saliut, Lulit dhe Monikës ne jemi më të vendosur për ta çuar përpara Reformën në Drejtësi dhe do të vijojmë të votojmë ligje të tjera të rëndësishme në Kuvend.
“Ditën e martë kur ata sulmuan deputetët ishte edhe përpjekja e fundit për të bllokuar votimin në Kuvend të strukturës së Këshillit të Lartë të Gjyqësorit dhe Këshillit të Lartë të Prokurorisë.
Edhe të martën që vjen ne përsëri kemi disa ligje që lidhen me implementimin e Reformës në Drejtësi dhe përsëri do të ketë protestues huliganë, që do të mblidhen në hyrje të Kuvendit. Të jeni të sigurtë se nuk janë më shumë se sa jeni ju këtu. Ne jemi votuar për të çuar përpara reformën në drejtësi. Të gjitha hesapet me dtejtësinë të këtyre 28 viteve, kushdo që i ka, nuk ka për të shpëtuar pa u hetuar ashtu siç duhet dhe pa u dënuar ashtu siç e meritojnë.
Mjafton që çdo shqiptar të bëjë një pyetje: çfarë mund ta bëjë bashkë Sali Berishën, Lulzim Bashën dhe Monika Kryemadhin? Ne jemi më shumë të bashkuar se kurrë për ta çuar përpara Reformën në Drejtësi”.
Më tej, iu drejtova socialistëve të Korçës, duke u thënë se PS është e vendosur të vijojë punën për zbatimin e kontratës që ka me qytetarët dhe çuarjen më tej të refomave për shtet, punë dhe mirëqenie.
Jemi të bindur se në zgjedhjet e 30 Qershorit PS do të jetë përsëri fituese, sepse puna e bërë në gjithë këto vite ka treguar se Bashkia e Korçës dëshmon modelin më të mirë të qeverisjes vendore.
PD-ja dhe LSI-ja vendosën t’i lëshojnë mandatet duke tradhëtuar atë pjesë të popullit që i votoi. Një gjë dua t’ua them socialistëve të Korçës, Devollit, Maliqit, Pustecit, Pogradecit dhe Ersekës, që ne nuk kemi ndërmend të ndërpresim punën tonë, drejt 2021-it. Përpara se të shkojmë në 2021-in kemi 30 qershorin.
Ne jemi të vendosur të vijojmë punën e nisur për Shqipërinë Europiane
