Në 2015 britanikët kanë bllokuar 5.5 ton gjethe duhani e duhan të grirë
Kompania britanike Crown Agents e ka dhënë përgjigjen e saj për nivelin e lartë të kontrabandës së cigares në Shqipëri. Pas mbylljes së kontratës me qeverinë, kompania po mban premtimin e saj për të publikuar gjetjet e kryera sa kohë ajo asistonte doganat shqiptare.
Duke qenë se mallrat e akcizës janë produkte më së shumti objekt i kontrabandës, britanikët e Crown Agents janë përqëndruar tek nafta, cigaret, birra e kafeja. Por produkti me rrjedhjen më të madhe në doganat shqiptare gjatë 2015 rezulton të kenë qenë cigaret.
Sipas Crown Agents në bashkëpunim me Doganat, Policinë e Shteti dhe Administratën Tatimore është organizuar një operacion i përbashkët në shkallë të gjerë për identifikimin e rasteve të prodhimit të paligjshëm të cigareve. Operacioni është zhvilluar në fund të muajit gusht 2015, në qytetin e Shkodrës dhe rrethinat e tij, në më shumë se 8 zona të dyshuara si baza veprimtarie të jashtëligjshme. Ekspertët shqiptarë dhe ata të Crown Agents kanë hyrë “në 10 ambiente të përfshira në prodhimin tregtar të duhanit të jashtëligjshëm dhe cigareve, duke bllokuar mbi 5,5 ton gjethe duhani dhe duhan të grirë. Në një nga ambientet e dyshimta, përveç makinerive të përdorura për grirjen e duhanit, ekipi i Crown Agents zbuloi gjithashtu një fabrikë prodhimi të cigareve të jashtëligjshme, si edhe mbi 1 milion cigare marke, të paketuara në kuti, gati për t’u shpërndarë”, thuhet në publikimet e britanikëve.
Ekspertët përfshirë në operacionin e asaj kohe, kanë fulur për dekonspirim të këtij aksioni në fjalë, pasi sipas tyre, në afërsi të Shkodrës ishin identifikuar dy fabrika të paligjshme, por njëra prej tyre dyshohet se u transferua në një zonë tjetër në Shqipërinë së Mesme.
Vlen të theksohet se sasia e gjethes dhe e duhanit të grirë të zbuluar nga britanikët është më shumë se konsumi vjetor i Shqipërisë. Kjo le dyshime se fabrikat e paligjshme nuk punojnë vetëm për tregun e brendshëm. Në vitin 2015 doganat zhdoganuan 2287 ton cigare përkundër 4000 ton të zhdoganuar në vitin 2010, viti me zhdoganimet më të larta të cigareve. Përllogaritet që kontrabanda e cigareve i kushton buxhetit të shtetit e pakta 50 milion euro në vit.
