Genti Tare, konsulli shqiptar në Stamboll, njëherësh vëlla i Igli dhe Auron Tares, ka kritikuar ashpër disa media në Shqipëri që kanë keqinformuar dhe shtrembëruar rëndë lajmet që kanë dhënë për tentativën për grusht shteti në Turqi.
I ftuar në studion e lajmeve të News24, Tare tha: “Disa analistë në Shqipëri janë krejt injorantë dhe s’ja kanë haberin fare situatës, asgjë nuk kanë parashikuar”.
Konsulli Tare, i cili është diplomat karriere dhe e njeh mirë gjendjen në Turqi, ka ndarë disa informacione të klasifikuara në lidhje me ngjarjet në Turqi.
Ai tha se tentativa për grusht shteti nuk është bërë nga ushtria, por nga disa struktura brenda shtetit. Tare tha se një grup njerëzish jo me uniforma ushtarake, por të veshur me të zeza. kanë shkuar tek hoteli ku gjendej Presidenti Erdogan në Marmara dhe kanë sulmuar hotelin, madje ka të vrarë edhe nga rojet e kreut të shtetit.
Tare tha se sipas të dhënave, është lëvizja “Gylen” ajo që ka organizuar puçin.
Diplomati shqiptar iu referua fjalimit të Ben Blushit në Kuvend që akuzoi Edi Ramën se kishte lejuar Erdoganin të sulmonte lëvizjen “Gylen” në Tiranë, kur tha se duhen prova.
“Çfarë do të thoshte sot Ben Blushi, ja ku janë provat”, tha Genti Tare, i cili shtoi se reagimi i popullit turk iu përgjigj menjëherë thirrjes së Erdogan, gjë që tregon besimin e tij tek institucionet dhe demokracinë.
“Sulmet që i bëhen Presidentit Erdogan janë dokrra. Nuk bëhet fare një analizë e asaj ç’ka bërë dhe pse ai vazhdon të votohet”, theksoi diplomati shqiptar.
/tesheshi.com/
