Jeta është e bukur. Ky është mesazhi që Chiara Bordi ka dashur të transmetojë përmes pjesëmarrjes së saj në “Miss Italia”. Bukuroshja nuk konkurroi për të fituar, por për të frymëzuar të gjithë ata që jeta i godet në lule të rinisë, në kulmin e bukurisë.
Ajo ka fituar vendin e tretë edhe pse ishte ndryshe nga vajzat e tjera, Chiara kishte njërën këmbë protezë. 18-vjeçarja, 6 vite më parë pësoi një aksident me motor dhe që prej atëherë ajo mban një protezë në këmbë.
Chiara bëhet kështu konkurrentja e parë në historikun e “Miss Italia”, që garoi me një këmbë protezë për kurorën e këtij titulli. Në rrjetet sociale ajo pati edhe shumë kritika nga komentuesit, të cilët shkruanin se asaj iu dha çmimi për mëshirë dhe jo se e meritonte atë.
“Po, mua më mungon një këmbë, por ty të mungon zemra dhe truri. Unë nuk jam e interesuar të fitoj, por t’i tregoj botës se jeta është ende e bukur kur rilind pas një ngjarje tragjike”, ia kthen një komentuesi në Facebook Chiara.
