Dorëzimi i ofertatve nga kompanitë mund të bëhet deri më 30 maj
Ministria e Transporteve e ka shtyrë edhe me disa ditë pranimin e ofertave nga kompanitë e interesuara për të marrë me koncension mirëmbajtjen e Rrugës së Kombit. Kompanitë që do të shprehin interes për të marrë me koncesion ndërtimin dhe mirëmbajtjen e ‘Rrugës së Kombit’ do të kenë afat deri në 30 maj për të dorëzuar ofertat. Ministria e Transportit dhe Infrastrukturës shpalli sërish në muajin shkurt ofertën për ndërtimin, operimin, mirëmbajtjen dhe rehabilitimin e autostradës Milot-Morinë, me gjatësi 60 km. Koncesionari i ardhshëm do të ndërtojë, përmirësojë, operojë dhe mirëmbajë autostradën në bazë të një sërë standardesh të paracaktuara të performancës gjatë koncesionit/PPP 30-vjeçar.
Qeveria shqiptare e pati shpallur edhe në fillim të vitit të shkuar ofertën për dhënien me partneritet publik privat ndërtimin, mirëmbajtjen dhe operimin e rrugës “Milot-Morinë”. Por tenderi u anulua pasi ofertat e kompanive pjeswmarrwse “China Communication and Construction Company” dhe “Vendeka Bilgi” u konsideruan të papranueshme nga autoritetet shqiptare për shkak të kostove të larta.
