Kalimi i pronësisë tek të huajt u bë pak kohë më parë
Operatori i tregtisë me shumicë të naftës “IT OIL International” është shitur te një kompani e huaj, me emrin “Tamm Oil Trading”. Transaksioni është regjistruar në QKR pak kohë më parë. Sipas të dhënave të transaksionit, “Tamm Oil Trading” është e regjistruar në Vjenë, dhe është e përfaqësuar nga Dr. Hans Jorg Tamm. Nga marrëveshja e shitjes rezulton se blerësi ka rënë dakord të paguajë 10 milionë euro shitësin, që duhet të shlyhet brenda 7 vitesh. IT Oil është krijuar në vitin 2011. Në 2013 mori aktivitetin e Taçi Oil International, pasi aksionerët e kësaj të fundit, në një marrëveshjeje shitjeje të kompanisë tjetër në pronësi të tyre, A.R.M.O, në gusht 2013, u ndaluan të merreshin me aktivitetin e tregtimit të karburanteve. Që nga viti 2011 kur është krijuar, I.S.C. Petroleum ka ndryshuar disa herë pronar. Fillimisht aksioner ishte Irgen Selfo, më pas u shit te E.B.C. OIL Company në pronësi të Elton Balliut. Më pas shoqëria kaloi në duart e Tamm Oil Trading dhe u bë ndërrimi i pronësisë nga shqiptare në të huaj. Nafta është sektori që ka lëvizjet më të mëdha në Shqipëri, me mbyllje të kompanive, apo rritje stratosferike të tyre brenda një periudhe të shkurtër kohore. 2014-a ka shënuar një numër rekord kompanish, një pjesë të krijuara në tetor 2013, që janë rritur ndjeshëm, pas daljes nga tregu të Taçi Oil në mesin e 2013-s.
