Kemi humbur 2-1 miqësoren e Vjenës dhe një rezultat i tillë kundër Austrisë që po kalon një periudhë të shkëlqyer duket ngushëllues. Por në fakt kjo e jona ishte një skuadër që nuk i ngjante fare asaj që ka luajtur në fazën eleminatore, madje edhe kur jemi mundur.
Minutat e para ishin panik për tanët që lëshuan rreth 70 metra fushë dhe të gjithë bënin garë me njëri tjetrin se kush gabonte më shumë. Ndërsa qendra e mbrojtjes me Canën dhe Mavrajn ishte një katastrofë dhe e tillë mbeti deri në fund të takimit. Dhe me atë vrull të fillimit, austriakët shënojnë dy gola të shpejtë, në të 6’ me Janko dhe shtatë minuta më vonë me Hornik. Ndërkohë që De Biazi kishte lënë në stol Cikalleshin, për ta filluar takimin me Balajn, ndërsa si mesfushor të djathtë kishte vendosur Andi Lilën, një mbrojtës klasik, duke mbajtur në krah të tij Odise Roshin.
Zëvendësimet u kryen në fillimin e pjesës së dytë, gjë që solli edhe balancimin e formacionit, ndërsa Xhimshitin dhe Ajetin, dy futbollistë të Serisë A, tekniku ilalian nuk i përdori fare në qendër të mbrojtjes. Pjesa e dytë e takimit nisi në mënyrën më të mirë të mundëshme për tanët, me një gol të Lenjanit, dy minuta pasi futbollistët u kthyen sërish në fushë nga dhomat e zhveshjes, por edhe rrezikuan të pësonin sërish, pasi vendasit vazhdonin të penetronin po në qendër, ku ishim difektoz si asnjëherë më parë. Ndërsa më pas është arbitri sllovak që e ekzagjeron, pasi dy kartonat e vetëm të verdhë që nxorri nga xhepi ia dha Kaçes, i cili e la skuadrën me 10 futbollistë. Dhe si përfundim kemi humbur në sytë e 7-8 mijë tifozëve tanë, që e kanë mbështetur skuadrën edhe në “Ernst Happel” të Vjenës, por ishte thjeshtë një miqësore, ndërsa kjo skuadër duket se ende nuk e ka gjetur formacionin e finaleve të Francës.
