Deputeti Koço Kokëdhima e ka cilësuar absurd ekzistencën ende në fuqi të ligjit të luftës mes Gerqisë dhe Shqipërisë. Në një intervistë për një television lokal në Janinë, Kokëdhima tha se ligji I luftës mban peng respektimine të drejtave të popullsisë çame. “Mendoj se çamët kanë të drejta dhe jo pretendime. Kanë të drejta, të cilat nuk duhen refuzuar apo paragjykuar politikisht. Këto të drejta duhen gjykuar si të drejta njerëzore dhe atyre duhet t’u jepet mundësia që t’i mbrojnë këto të drejta në mënyrë tekniko-ligjore, si të gjithë qytetarët e tjerë grekë ose jo grekë”, tha Kokëdhima.
Ai ka refuzuar perceptimin sipas të cilit minoritet greke në Shqipëri nuk respektohen. “ Ne e vlerësojmë minoritetin grek në Shqipëri si pjesë të pandarë të popullit shqiptar, që ka jetuar dhe ka ndarë gjithçka me popullin shqiptar, ka qenë bashkë me të edhe në ditë të mira, edhe në ditë të këqija. Dua t’ju them edhe një provë të faktit që qeveria e Shqipërisë e ka trajtuar minoritetin grek me shumë drejtësi dhe barazi. Në reformën territoriale të vitit 2014, ne miratuam dy bashki të minoritetit. Jo vetëm që nuk kemi lënë fshatra të minoritetit jashtë, por përkundrazi, kemi lënë fshatra shqiptare brenda këtyre bashkive”, tha Kokëdhima.
