Nga Aleksandër Biberaj
KOHA KUR POETËT PUSHKATOHESHIN PËR NJË POEZI!
VILSON BLLOSHMI QË U PUSHKATUA NË MOSHËN 29 VJEÇARE PËR POEZINË “SAHARAJA” SOT DO TË MBUSHTE 72 VJEÇ! ENVER HOXHA PUSHKATOI POETË NDËRSA STALINI JO!
Poeti martir Vilson Blloshmi, nëse nuk do të pushkatohej barbarisht nga regjimi komunist, dhe zoti do ti jepte jetë, do të mbushte sot plot 72 vjeç. Ai lindi si sot më 18 mars 1948 në Bërzeshtë të Librazhdit dhe u pushkatua bashkë me poetin tjetër Genc Leka më 17 korrik 1977. Barbaria komuniste që e dënoi me vdekje poetin Blloshmi vetëm në moshën 29-vjeçare, ndër të tjera lidhet edhe me poezinë e mëposhme “SAHARAJA”, ku Shqipëria e asaj kohe krahasohet me guxim nga Blloshmi me shkretëtirën e Saharasë!
“SAHARAJA”
Saharaja s’di të ëndërrojë.
Ajo bluan gurë me mend’ e saj…
Saharaja s’ka këngë të këndojë,
Saharaja s’ka as lot të qajë.
Saharaja nuk ka miq e shokë,
Saharaja nuk ka bijë, as bir.
Saharaja është një copë tokë,
Thonë se dhe me natën s’shkon mirë.
Vilsoni ndoqi shkollën e mesme Pedagogjike në Elbasan dhe pas mbarimit të saj edhe pse me rezultate të shkëlqyera nuk u lejua të vazhdonte shkollën e lartë. Pas diplomimit në Elbasan punoi në punë të rënda krahu. Gjatë kësaj kohe iu përkushtua shkrimit dhe përkthimit, por pa patur mundësi t’i botonte për arsye se ishte me biografi të “keqe”. Vilson Blloshmi përndiqej nga Sigurimi i Shtetit dhe u arrestua në vitin 1977 me akuzën “sabotim në ekonomi dhe agjitacion e propagandë”. Ditarët, përkthimet dhe poezitë iu sekuestruan dhe iu nënshtruan hetimit në detaje. Letërsia e tij do të përbente “rrezik” për regjimin komunist shqiptar. Në datën 13 qershor 1977 Gjykata e Rrethit Librazhd (pasi e kishte dhënë vendimin më parë PPSH), do t’i dënonte dy poetët Vilson Blloshmin dhe Genc Lekën me vdekje, pushkatim, vendim i cili u zbatua në datë 17 korrik 1977. Në vitin 1994 Vilsonit dhe Gencit iu dha dekorata “Martir i Demokracisë” dhe në vitin 2006 u shpallën “Qytetar Nderi” të rrethit të Librazhdit. Në nder të dy poetëve është ngritur një memorial bronxi në qytetin e Librazhdit. Vetëm regjimi kriminal i Enver Hoxhës pushkatoi poetë, pasi as regjimi i Stalinit dhe asnjë regjim ish-komunist në Europën Jug-Lindore nuk pushkatoi poetë. Respekt dhe mirënjohje për veprën dhe sakrificën sublime të tyre në emër të lirisë dhe qytetarisë! U prehshin në paqe në altarin e kombit!
