Në mjediset e auditorit të Ministrisë së Mbrojtjes u zhvillua ceremonia e 65-vjetorit të krijimit të Kompanisë së Radiozbulimit, sot Agjencia e Inteligjencës dhe Sigurisë së Mbrojtjes (AISM), pjesë e strukturave të Forcave të Armatosura.
Të pranishëm në këtë aktivitet ishin ministrja e Mbrojtjes Mimi Kodheli, zëvendësministri Idlir Peçi, komandantë forcash, punonjës të AISM-së dhe veteranë të radiozbulimit.
Drejtori i Përgjithshëm i AISM, kolonel Bardhyl Kollçaku, vlerësoi punën në vite të kësaj strukture dhe ndau me të pranishmit kuriozitete në lidhje me rolin e kompanisë së radiozbulimit të Forcave të Armatosura, në informimin e ngjarjeve historike brenda edhe jashtë vendit.
Në fjalën e saj, ministrja e Mbrojtjes shprehu konsideratën dhe respektin e saj të veçantë për arritjet ushtarake të këtij shërbimi ndër vite dhe risolli edhe njëherë në kujtesë situatat e vështira në të cilën ushtarakët e asaj kohe duhet të përballeshin: “Pjesën e historisë, arritjeve dhe sukseseve unë gjithnjë ua lë historianëve dhe drejtuesve ndër vite. Kam respekt dhe konsideratë të veçantë për të gjitha arritjet mirëfilli ushtarake të këtij shërbimi. Keni punuar në kushte të vështira duke përballuar njëkohësisht edhe armikun e jashtëm edhe paranojën e politikës izoluese.”
Më tej, ministrja Kodheli rikujtoi momentin që mori detyrën e ministres së Mbrojtjes dhe vuri në dukje ndryshimin e madh që ka përdorimi i këtij shërbimi dje dhe sot. “Kur kam nisur punën si ministre e Mbrojtjes, thuajse katër vjet më parë, vija nga opozita e përgjuar nga agjencia juaj, e përndjekur nga pajisjet tuaja, e kërcënuar nga hija e zezë e keqpërdorimit të një shërbimi inteligjent ushtarak. Politikanë të opozitës së këtij vendi, së bashku me shumë diplomatë perëndimorë, përjetonim realitete pinoçetiane në shekullin e 21-të, në zemër të Evropës, në një vend NATO. Dhe që askujt mos t’i ndodhte ajo që i bëhej opozitës së para 2013, pata si objektiv kryesor pastrimin e së keqes nga agjencia juaj.”
Duke vënë theksin te burimet e mira njerëzore që kjo agjenci ka, ministrja Kodheli i kërkoi shërbimit të zbulimit të sinjaleve dhe komunikimeve rritjen e përkushtimit dhe profesionalizmit, me qëllim bashkëpunimin sa më të ngushtë me strukturat aleate, për t’iu përgjigjur sfidave të kohës.
“Duhet që shërbimin e zbulimit të sinjaleve dhe komunikimeve ta shndërrojmë realisht në një pjesë të integruar serioze e profesioniste të strukturave të ngjashme të NATO-s, organizatës përmes së cilës ne garantojmë mbrojtjen e përbashkët. Personeli juaj operon më profesionalitet në shtabet dhe komandat e NATO-s dhe shpesh marr falenderime për punën tuaj.”
Kompania e Radiozbulimit u krijua 65 vjet më parë si një strukturë e Forcave të Armatosura, e njohur në atë kohë si “Kompania e kapjes së komunikimeve fonike dhe elektronike që vijnë nga jashtë territorit të Republikës së Shqipërisë”, përfundoi Kodheli.
