Nga Enkel Demi
Klajdi Spahiu është një djalë vetëm 20 vjeç dhe jeta i ka vënë ballas një nga sfidat më të rënda. Ai vuan nga leukemia akute dhe po kurohet në Gjermani. Mua dhe Klajdit na bashkon “marrëzia” pas Juventusit. Unë nuk e njoh atë, por janë djemtë dhe vajzat e Juventus Club Albania që më kanë shkruar. Të mërkurën në mbrëmje tifozët e Juventusit takohen në Pallatin e “Asllan Rusi” për të ndjekur tok ndeshjen ndaj Bajernit të Mynihut. Atje do të mbledhin sa para të munden për këtë djalë, i cili për një muaj duhet të ketë 60 mijë euro që të operohet.
Uroj me gjithë shpirt që t’ia dalin shokët, por mbi të gjitha Klajdi. Këtu, dua të çoj më tej nja dy rradhë.
Ndodh shpesh në radio apo televizion, gazeta, portale, rrjete sociale që të organizohen fushata ndihmash për nevojtarë të ndryshëm, të cilët jeta i ka vënë në beteja të mëdha si rasti i Klajdit sot apo Ambrës dje. Në të gjitha rastet zgjidhja ose vjen nga djem e vajza zemërflori si këta që përmenda më lart, nga redaksi që vënë në rrugë kutinë e ndihmave në të holla, ose nga individë që e kanë mundësinë si fjala vjen vëllezërit Keta apo lojtari i Kombëtares Mërgim Mavraj.
Do ma kishte ënda që ndihma të vinte nga qeveria, shteti. Në fakt, për hir të së vërtetës nuk është se kontributi i shtetit ka munguar gjithmonë. Di madje të paktën dy raste konkrete ku qeveria ka ndërhyrë dhe ka shpëtuar jetët e të sëmurëve rëndë. Por, mendoj se duhet ta bëjë këtë për çdo rast të vështirë që mundësisht mos të ketë më fushata të kësaj natyre. Ndoshta kjo që them unë mund të tingëllojë marroke për ata që drejtojnë punët e këtij vendi, por jam i bindur se do të jetonim në një shoqëri më të mirë, nëse individi vihet në qendër të vëmendjes. Deri më tash kemi në qendër të vëmendjes propagandën dhe reformën. Individi është armiku i shtetit, duke vazhduar traditën që na la regjimi i kuq. Njeriu duhet të jetë më i rëndësishmi dhe pas tij vjen reforma. Shëndetësia bëhet që të shkojë tek fundori, i sëmuri, jo rrashë e vdiqa tek konçesioni. Në drejtësi ndërhyhet që të rritet mirëjetesa dhe të garantohet e drejta, atdheu, familja. Rendi ruan jetën e pronën dhe kështu me rradhë. Republika ruan shoqërinë, e cila në qendër të vëmendjes ka njeriun.
Rasti i Klajdi Spahiut që ka nevojë për 60 mijë euro zgjidhet vetëm me vendim qeverie. Ka gjasë që familjarët, të afërmit, shokët, mos ta kenë zërin aq të lartë sa të dridhen qelqet e godinave të qeverisë, ndaj i drejtohen gjindjes, të panjohurëve. Nesër do ketë një rast tjetër dhe përsëri do ngjasë kjo histori. Përse qeveria që premtoi shëndetësi falas nuk e nis këtë eksperiment me Klajdi Spahiun? Ta ketë ai falas këtë operacion në Gjermani dhe qeveria të paguajë nga sigurimet shëndetësore, të babit dhe mamit të tij, nga të miat dhe kështu të bëjë me të tërë. Nëse nuk i dalin paret mos të japë me konçesion sterilizimin e instrumentave kirurgjikalë, sepse kemi Klajdin më të shtrenjtë. Ta mendojë qeveria si për fëmijën e vet.
