Pas mbledhjes së Këshillit të Sigurisë mbrëmë, kanë nisur të mësohen informacione konkrete për qendrimet mes palëve. Nga burime të mirëinformuara mësohet se çështja e anullimt të koncesioneve, ka qenë një temë e rëndësishme e debatit mes kreut të opozitës Lulzim Basha dhe kryeministrit Edi Rama.
Zoti Basha ka kërkuar rritjen nga qeveria të buxhetit që i vjen në ndihmë ekonomisë dhe qytetarëve, duke patur si moto kryesore “ruajtjen me çdo kusht të vendeve të punës”. Burimet bëjnë me dije se zoti Rama ka deklaruar që “qeveria nuk ka më shumë mundësi sesa ka bërë dhe po bën me paketën e zgjeruar të ndihmës”.
Ky qëndrim nuk është pranuar si realist nga kreu i opozitës. Zoti Basha ka argumentuar se qeveria ka mjaftueshëm parà për të shtuar fondin e ndihmës. Ai ka përmendur fondet e koncesioneve, duke i kërkuar kryeministrit të vendosë për anullimin e tyre. “Le të marrim për shembull koncesionet dhe PPP-të për 3 inceneratorët – mësohet të jetë shprehur Basha – vetëm anullimi i tyre lehtëson buxhetin nga një barrë prej qindra milionë euro në vite dhe afro 20 milionë vetëm këtë vit”.
Mësohet se kryetari i PD ka përmendur edhe shumën totale prej 120 milionë dollarë për koncesionet e tjera këtë vit, të cilat ai kërkon të anullohen për të shpëtuar ekonominë e vendit nga kriza dhe për të mos shkuar drejt mbylljes së detyruar të mijëra vendeve të punës.
Burime të besueshme bëjnë të ditur se kryeministri Rama ka refuzuar në mënyrë kategorike anullimin e koncesioneve dhe PPP-ve të inceneratorëve të Elbasanit, Fierit dhe Tiranës. Kreu i qeverisë nuk ka dhënë asnjë argument për mosanullimin e këtyre koncesioneve, por ka thënë vetem “Kjo është diçka që s’bëhet. Jam absolutisht i prerë në këtë vendim”.
