Prezenca e Komisioneres Mariya Gabriel në tryezën për Arsimin në krah të Lulzim Bashës, u quajt nga kryeministri Rama si një përfshirje të KE-së në fushatën e brendshme në Shqipëri.
Në lidhje me këto akuza ka reaguar dhe vetë Komisioni Europian, ku thekson se Komisionerja Gabriel ishte e ftuar nga ana e Universitetit të Vjenës dhe pjesëmarrja e saj ishte e kufizuar vetëm në dhënien e një fjalimi pa ndikim në fushatë.
KE: Komisioni nuk komenton mbi komentet e palëve të treta. Lutemi të keni parasysh që Komisionerja Mariya Gabriel mori pjesë në Tryezën e 18-të Rrumbullakët mbi Arsimimin, me ftesë të Universitetit Modul të Vjenës, i cili është organizatori i këtij eventi. Pjesëmarrja e komisioneres ishte e kufizuar vetëm në dhënien e një fjalimi kryesor.
Fjalimi, i cili është i publikuar në faqen e internetit të Komisionit, është i fokusuar mbi iniciativat e fundit evropiane në fushën e arsimimit dhe të kërkimit, të cilat vlejnë për të gjithë rajonin e Ballkanit Perëndimor, përfshirë Shqipërinë. Komisionerja nuk bëri ndonjë deklaratë për ndonjë parti politike, por mbajti një fjalim mbi çështjet që kishin të bënin me fushën e saj.
