Debati mes dy zëvendës ministrave të bujqësisë maqedone
Debati politik në Maqedoni pasurohet me elemente të rinj. Tashmë nuk bëhet më fjalë për “mollë sherri”, po për “kastravec sherri”. Ljupço Nikollovskit, zv. ministër plotësues në ministrinë e Bujqësisë, Pylltarisë dhe Ujërave të Maqedonisë ka deklaruar se trangulli që importohet nga Shqipëria ka pesticide mbi normën e lejuar. Kaq ka mjaftuar që kolegu i tij Vanço Kostadinovski, po zëvendës ministër i Bujqësisë, Pylltarisë dhe Ujërave të Maqedonisë të ndërhyjë duke deklaruar publikisht se kastraveci i importuar nga Shqipëria përmban 25 herë më pak pesticide krahasuar me normën e lejuar. Në mbrojtje të thënieve të veta ai ka dalë në konfrencë shtypi, pasi ishin bërë analizat edhe me dy dëshmitarë përkrah, drejtorin e Agjencisë së Ushqimit dhe drejtoreshën e Laboratorit Shtetëror. Pas kësaj beteje as ministri shqiptar i bujqësisë nuk e ka humbur rastin për të ndërhyrë. Ai ka deklaruar për mediat e Tiranës se ajo që kishte ndodhur “Është veprim i nxituar dhe i pajustifikuar. Perimet tona janë super të pastra”, ka thënë Edmond Panariti.
