Komuniteti katolik i shqiptarëve të New York-ut priti të dielën Kardinal Ernest Troshanin. Ai mbajti një meshë në Kishën “Zoja e Shkodrës” në Hartsdale. Dom Ernesti, të cilit vitin e kaluar iu dha titulli i lartë i Kardinalit nga Papa Françesku, tha se është e nevojshme që shqiptarët t’i shtrijnë njëri-tjetrit dorën e pajtimit.
“Në një moshë kaq të avancuar nuk e mendoja kurrë këtë funksion kaq të lartë që do të merrja, por i nalti Zot ka planet e veta”- tha kardinali shqiptar.
Dom Ernesti është njeriu i përvuajtur, që sakrifikoi shumë në jetën e tij. Ai u arrestua në vitin 1963 sepse mbajti meshë për Presidentin e vrarë amerikan John Kennedy dhe u dënua me 18 vjet burg. Punoi në kampet e Rubikut dhe të Spaçit, vuajti për vite me radhë dhe sot në moshën 88 vjeçare thotë se ndihet i nderuar që e vërteta ka fituar.
Në shtator 2014, Dom Ernesti dëshmoi përpara Papës për vuajtjet e Kishës dhe ata të dy patën një takim emocional. Viktimizimi i klerit shqiptar si rast i pashembull në historinë e Kishës katolike ishte një faktor që Papa e emëroi Dom Ernestin kardinal. Besimtarët thonë se toleranca fetare mes shqiptarëve ishte një tjetër faktor me rëndësi./ VoA
