Prej tre ditësh Tomor Qama ndodhet i shtruar ne Spitalin e Traumës. Ai u përplas nga një kamion që drejtohej nga Ylvi Kalaja teksa po udhëtonte me biçikletë, e për pasoje iu thyen te dyja këmbët. Ai rrëfen se familjarët e shoferit që e ka aksidentuar e kanë kërcënuar, ndërsa policia nuk ka marrë asnjë masë.
“Vajza dhe nusja e djalit të familjes Kalaja më kanë kërcënuar dhe më kanë thënë që i ke dalë para kamionit dhe na ke shkaktuar dëm. Tre ditë oficeri i policisë gjyqësore nuk erdhi. Më në fund erdhi dje gjithë hipokrizi, tallje. Kemi njoftuar dhe policinë për kërvcënimin e kësaj familjeje, por këtu nuk funksionon as policia, as prokuroria as gjykata“, u shpreh Qama.
Në lidhje me ngjarjen ka folur edhe miku i të dëmtuarit, Xhevahir Asllani.
“Ata erdhën dhe në fillim i thanë të mbulojmë shpenzimet dhe ditën tjetër kanë dashur të marrin me forcë letrën e mjekut. E kemi njoftuar policinë, por janë bërë disa veprime krejt të papërfillshme“, u shpreh Asllani.
