Vijon të jetë mjaft e tensionuar situata në zonën e Astirit, ku që prej mëngjesit janë parë në zonë punonjës të policisë bashkiake dhe të policisë së shtetit.
Një prej banorëve u shoqërua me forcë prej policëve të shqiponjave, mirëpo banorët e tjerë që ishin në protestë bllokuan furgonin duke bërë të mundur lirimin e tij.
Duke folur për gazetarin e Fax News, Sokol Dema, banori tha që policët ushtruan dhunë ndaj tij duke e qëlluar me grushte. Në pjesën e buzës protestuesi kishte rrjedhje gjaku, ç’ka vërteton dhunën e ushtruar.
“Kam punuar 15 vite në Angli dhe e kam sjellë të gjithë mundin këtu në këtë shtëpi, dhe të vijë të ma prishë ky robq*ri…”, u shpreh banori që u shoqërua me forcë nga ana e policisë.
Banori vijoi më tej duke thënë se kjo është hera e katërt që po tentohet që t’i prishet banesa dhe lokali, ku ka mundur që të punësojë një pjesë të të afërmve të tij, të cilët gjenden në kushte të rënduara ekonomike.
