Në një intervistë për mediat Ish-deputeti i Partisë Demokratike, Fatbardh Kadilli, ka thënë se Berisha përdor gjuhën e ashpër e qëllimtë, për të trimëruar detashmentin e tij, dhe për të ngjallur urrejtje. Por sipas tij, e djathta nuk urren, e djathta bashkon.
“Një nga gjërat që unë kam pas distancë gjithmonë me Berishën, që kur ishte president dhe unë këshilltar, është gjuha e ashpër e qëllimtë, për të trimëruar detashmentin e tij, dhe për të ngjallur urrejtje. E djathta nuk urren, e djathta bashkon” – tha Kadilli.
Kadilli gjithashtu tha se Berisha ka treguar gjithmonë një mungesë respekti për fjalët që thotë.
“E dyta, mungesa e konsekuencës. Ish- komunisti fanatik, u bë antikomunist fanatik. Shumë mirë. Në 1994 ishte fanolisti që përzuri Lekën e I-rë, në 1997 ishte zogisti i thekur që i jepte Lekës të gjithë aksesin për të rimarrë mbretërinë. U bë liberali më ekstrem, duke i thënë Ramës se nuk kishte bërë asgjë për martesat gay, reaguam unë dhe Tritan Shehu. Ishte kampioni i liberalizmit, tani bën konservatorin. E quajti llum i kombit Nanon, një vit e gjysmë pas donte ta bënte president. E quajti Lulzim Brava ish-liderin e PD-së, sot e quan sërish Basha. Kjo është mungesë e vazhduar mosrespekti për fjalën që thua, dhe nuk ka njeri që nuk e kupton. Mund të ndryshosh qëndrim, por duhet të ketë një arsye të fortë. Çfarë e bëri Fatos Nanon nga një nga personat më të korruptuar në Ballkan në një kandidat për president, çfarë ndryshoi te Basha që iku? Këto gjera nuk i japin seriozitet një politikani”- thotë Kadilli.
