Duket se i ka ardhur fundi edhe telenovelës Gonzalo Higuain. Sipas mediave italiane gjithcka është konkretizuar dhe argjentinasi do të jetë shumë shpejt në Torino për të veshur fanellën e Juventusit.
Sulmuesi madje ka kryer vizitat mjekësore në fshehtësi të plotë në një klinikë në Madrid, ndërsa akordi mes tij dhe klubit torinez ish gjetur prej kohësh. Problemi më i madh ishte marrëveshja me Napolin, por Juventusi ka vendosur të paguajë klauzolën e largimit që lojtari ka në kontratën e tij me napoletanët, pra 94.7 milion euro.
Një shifër vërtetë strastosferike që e rendit transferimin e argjentinasit tek Juvja si një ndër lëvizjet më të shtrenjta në shitorinë e futbollit, dhe pa diskutim mund të cilësohet transferimi rekord në Serinë A.
Ndërkohë që Higuain do të nënshkruajë një marrëveshje 4 vjecare nga e cila do të përfitoj 7.5 milion euro në sezon dhe do ti takojnë të gjitha fitimet nga të drejtat e imazhit, në ndryshim nga kontrata e tij me Napolin, ku shifrat e përfituara nga të drejtat e imazhit ndaheshin në mënyrë të barabartë mes klubit dhe lojtarit.
Një përforcim vërtetë i rëndësishëm për kampionët e Italisë që deri më tani mund të vlerësohen me notën 10 në merkato duke qënë se kanë afruar edhe element si Pjanic, Benatia, Dani Alves e Marco Pjaca. Tashmë me një sulmues të kalibrit të Gonzalo Higuain objektivi Uefa Champions League kthehet në detyrim për bardhezinjtë.
