Për 15-20 ditë pritet një përgjigje përfundimtare nga Pol Pogba, nëse dëshiron të qëndrojë, ndërsa për Mustafin bisedimet me Valencian kanë avancuar, madje flitet për një shifër transferimi rreth 15 milionë euro
Objektivi i sezonit të ardhshëm është titulli i madh në Champions, pasi për Juven në Itali është bërë shumë e thjeshtë. Kështu që tashmë po mendohet për skuadrën që do t’i përgjigjet kompeticionit të ardhshëm europian. Synimi kryesor është të bëjnë të qëndrojë mister “100 milionëshin”, Pol Pogba. Për këtë arsye, klubi i ka kërkuar futbollistit francez që të vendosë nëse dëshiron të vazhdojë me bardhezinjtë, por ndërkohë duhet të japë një përgjigje ekzakte brenda 15-20 ditësh. Por gjatë kësaj periudhe, Juve po sheh me interes nga Valencia, ku priten të happen tratativat për Shkodran Mustafin, mbrojtësin 24 vjeçar të përfaqësueses gjermane, i cili ka pasur një të shkuar edhe tek Sampdoria. I transferuar për 9 milionë euro nga spanjolët, Mustafi duket futbollisti më i përshtatshëm për të zëvendësuar Kaseres. Ndërkohë që menaxheri i lojtarit është në Spanjë për të arritur marrëveshjen për çmimin e ri, që flitet të jetë rreth 15 milionë. Po në Valencia, duket se kampionët e Italisë janë shumë të interesuar edhe për mesfushorin portugez, Andre Gomes, i cili tashmë po kërkohet nga shumë klube. Në këtë rast mund të bëhet pengesë vetëm çmimi i 22 vjeçarit që është i konsiderueshëm, pasi varion nga 25 deri në 30 milionë euro. Ndërsa për çështjen “Morata” Juventus vazhdon të ketë të njëjtin qëndrim, pra ta mbajë futbollistin, por fjala e fundit i mbetet Realit. Marota është i gatshëm t’i ofrojë Florentino Perez 25 milionë euro për ta hequr klauzolën për sulmuesin, por me këtë shifër nuk janë të shumta mundësitë që numri 1 i klubit spanjol të bindet. E njëjta dëshirë është edhe për Kuardadon e marrë hua nga Çelsi, por vështirë se mund të vazhdojë aventurën në Torino, me mbërritjen e Antonio Kontes në Londër. Ndërsa emrat e tjerë që qarkullojnë janë po të njëjtët: Mkitarian, Kavani, Pastore, Isko dhe Oskar, por më parë duhet të bëjnë të rinovojë trajnerin Alegri.
