Në kuadër të 77-të vjetorit të Genocidit Grek ndaj shqiptarëve të Çamërisë , nga data 21 qershor deri në datën 27 qershor , PDIU, Shoqata Patriotike “Çamëria” dhe Fondacioni Çamëria “Hasan Tahsin” organizojnë “Java Çame” e cila do të jetë e mbushur me aktivitete kulturore , letrare , historike etj dhe do kulmojë me homazhe në varrezat monumentale të Kllogjerit në Sarandë.
“Java Çame”, nisi ditën e sotme në ora 11:00, në sheshin “Skënderbej” me vendosjen e gërmave “I Love Çamëria” dhe ekspozitën “Çamëria ndër shekuj në harta dhe gravura paraqitur nga historianë dhe artistë të kohës”.
Në hyrje të sheshit “Skënderbej”, aleati i parë i Lulzim Bashës, Shpëtim Idrizi ka konfirmuar se do të jetë në parlament në shtator. Gjatë një prononcimi për mediat nga sheshi “Skënderbej” në kuadër të aktivitetit për Javën Çame, theksoi se do të rikthehet çështja çame në Parlamentin e Shqipërisë.
“Padyshim në shtator jemi në Parlament për të paraqitur iniciativa ligjore për çështjen çame. Do të rikthehet çështja çame në parlamentin e Shqipërisë, do të tentojë të thyejë heshtjen mbi çështjen çame,” u shpreh Idrizi.
