Këshilli i Ministrave ka marrë ditën e sotme disa vendime në lidhje me pagat e mësuesve për sistemin arsimor parauniversitar dhe mjekët.
“Në vendimin nr.175, datë 8.3.2017, të Këshillit të Ministrave, “Për trajtimin me pagë dhe shtesa mbi pagë të punonjësve mësimorë dhe të punonjësve të tjerë jomësimorë në arsimin parauniversitar”, të ndryshuar”, bëhen këto ndryshime në lidhje me orët shtesë të mësuesve:
1-Në shkollat e arsimit të mesëm të lartë 390 lekë/për orë;
2- Në shkollat arsimit fillor dhe të mesëm të ulët 300 lekë/për orë”, ka vendosur Këshilli i Ministrave me propozimin e kryeministrit të vendit, Edi Rama.
Po ashtu ka qenë dhe Ministrja e Arsimit Evis Kushi e cila ka njoftuar rritjen e pagave për mësuesit e sistemit arsimor parauniversitar. Ajon është shprehur se nga data 1 korrik, pagat do të rriten me 6%.
“Për të gjithë punonjësit e sistemit arsimor parauniversitar, finalizuam angazhimin që kemi ndërmarrë që në fund të vitit të kaluar me miratimin e buxhetit për këtë vit. Do të rriten 6% pagesat e punonjësve të sistemit të arsimor parauniversitar. 36 mijë punonjës që do përfitojnë nga data 1 korrik. Po rritet edhe paga e punëtorëve psikosocialë dhe oficerëve të sigurisë. Dua të theksoj që do të ketë rritje edhe për orët suplementare të mësuesve. Me 10% shtesa e orës suplementare për mësuesit”, njoftoi Kushi.
Në mbështetje të nenit 100 të Kushtetutës dhe të pikës 2, të nenit 4, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, Këshilli i Ministrave vendosi që mjekët e sistemit të ministrisë përgjegjëse për shëndetësinë, të cilët, pas përfundimit të specializimit në spitalet universitare, në bazë të detyrimit kontraktor me ministrinë përgjegjëse për çështjet e shëndetësisë, emërohen sipas nevojave të sistemit shëndetësor, larg vendbanimit të tyre, për një periudhë trevjeçare, përfitojnë një kompensim për kosto jetese, në masën 15 000 (pesëmbëdhjetë mijë) lekë në muaj.
Për punën e kryer nga ora 19:00 deri në orën 22:00, si dhe për punën e kryer nga ora 22:00 deri në orën 06:00 përfitojnë shtesë mbi pagë, që vijon:
Në spitale dhe në Qendrën Kombëtare Terapeutike dhe Rehabilituese për Fëmijët: Nga ora 19:00 deri në orën 22:00 Nga ora 22:00 deri në orën 06:00
Për ditët e zakonshme 120 lekë 500 lekë
Për ditët e shtuna 200 lekë 800 lekë
Për ditët e diela e festat 240 lekë 1 000 lekë
Në pikën 12/4, shpërblimi i punonjësve të personelit të Zyrës së Mbrojtjes nga Rrezatimi, pjesë e Institutit të Shëndetit Publik, bëhet në masën 15 000 (pesëmbëdhjetë mijë) lekë në muaj.
Po ashtu 7 500 (shtatë mijë e pesëqind) lekë në muaj, për nëpunësit e strukturave të TIK-ut, të institucioneve qendrore të sistemit të Ministrisë së Shëndetësisë dhe Mbrojtjes Sociale dhe në qendrat spitalore universitare/spitalin rajonal “Memorial” Fier;
– 5 000 (pesë mijë) lekë në muaj, për nëpunësit e strukturave të TIK-ut, të spitaleve rajonale apo bashkiake, të sistemit të Ministrisë së Shëndetësisë dhe Mbrojtjes Sociale.
Këto vendimi hyjnë në fuqi pas botimit në “Fletoren zyrtare” dhe i shtrin efektet financiare nga data 1 korrik 2022.
