Të paktën 83 persona u vranë dhe më shumë se 200 të tjerë u plagosën, si pasojë e dy bombave që shpërthyen në kryeqytetin irakian, Bagdad. Shteti Islamik mori përsipër sulmet nëpërmjet një komunikate në internet.
Sulmi i parë u krye nga një kamikaz që hodhi veten dhe makinën e ngarkuar me eksploziv në zonën e Karadës, pranë një restoranti dhe një qendre tregtare, mesnatën e së shtunës.
Bomba e dytë shpërtheu në një zonë me banorë kryesisht shiitë në Veri të kryeqytetit Bagdad. Shteti Islamik kontrollon zona të mëdha në Veri dhe Perëndim të Irakut.
