Kryetari i sapozgjedhur në zgjedhjet e 6 marsit i Bashkisë Shkodër, Bardh Spahia, në një intervistë për emisionin “Kjo Javë”, ka treguar arsyen se pse kandidoi në këto zgjedhje. Sipas tij, ishte situata në PD e cila shtyu atë të kandidojë dhe u shpreh se nuk mund t’u thoshte jo shkodranëve që për vite me radhë kanë sakrifikuar aq shumë jo vetëm për PD-në por edhe për qytetin.
“Ndjej krenari që isha i përzgjedhuri i tyre. Vendimi për të marrë pjesë si kandidat ishte edhe rezultat i situatës së PD-së e cila imponoi vendimin tim për të marrë pjesë në Primare. Nuk mund t’u thoja jo shkodranëve që për vite me radhë kanë sakrifikuar aq shumë jo vetëm për PD-në por edhe për qytetin. Pasioni im mbetet kirurgjia, vazhdimisht kam qenë në sallën e operacioneve kryesisht në Itali por me të vërtetë ishte një kërkesë nga bashkëpunëtorët e degës Shkodrës. E kisha bindje absolute që do të fitoja dhe dëshirën e shkodranëve për të vendos me votën orientimin e Shkodrës drejt të djathtës” – tha Spahia.
Kujtojmë se Spahia kandidoi nën siglën “Shtëpia e Lirisë” dhe fitoi bindshëm në Bashkinë e Shkodrës me 20.125 vota.
