Pak ditë më parë, pesë persona të maskuar kanë kërcënuar më armë për t’i grabitur brenda në banesë futbollistin Klaudio Markizio dhe gruan e tij.
Ish-lojtari i Juventusit ka rrëfyer tmerrin e përjetuar që pavarësisht presionit të armës në kokë, ja kishin dalë mbanë të ishin të qetë.
“Ata na vendosën pistoletat në kokë. Unë nuk kisha parë asnjëherë në jetën time armë të vërtetë. Për fat të mirë ia dolëm të ishim të ftohtë. Ishin pesë burra që hynë në shtëpinë tonë. Ata më pyetën se ku i kishim fshehur gjërat me vlerë. Unë iu thashë atyre se nuk kemi një vend ku i mbajmë, megjithatë ata nuk më besuan. Morën gjithçka gjetën dhe u larguan menjëherë”, shprehet Markizio për “Corriere della Sera”.
Markizio thekson më tej se fatmirësisht fëmijët nuk ishin në shtëpi, ndërsa po përjetonte dyfish frikë nga prania e bashkëshortes.
“Isha shumë i frikësuar, si për veten ashtu edhe për bashkëshorten. Për fat të mirë, në ato momente fëmijët nuk ishin në shtëpi. Kishin shkuar të luanin futboll, dhe nuk ishin kthyer ende. Ishim të frikësuar, por fatmirësisht mbetëm të qetë edhe kur na kërcënuan me pistoletë në kokë”, tha Markizio.
