Ish kreu i antimafias italiane në Leçe, Cataldo Motta ka deklaruar se situata e trafikut të drogës është nën kontroll.
I pranishëm në Tiranë në konferencën ndërkombëtare “Qasjet e reja hetimore ndaj organizatave kriminale qe perdorin internetin”, Motta vlerëson skuadrën e përbashkët të hetimit që u ngrit në dhjetor.
“Situata e trafikut të drogës mund të thuhet që është nën kontroll. Në kuptimin që kemi një bashkëpunim me autoritetet shqiptare dhe kemi ngritur një skuadër të përbashkët hetimi (që u ngrit në dhjetor) dhe hetimet po japin rezultate të mira.
Është përmirësuar shumë bashkëpunimi. Hetimet e përbashkëta janë shumë të rëndësishme, sepse punohet për të njëjtin hetim parë nga këndvështrime të ndryshme. Secili vë në dispozicion të tjetrit njohuritë që ka përfituar në hetim. Ndër të paktat gjëra që besoj është bashkëpunimi internacional.”- u shpreh Motta.
Motta tha se është e pamundur të ndalohet prodhimi i lëndëve narkotike nga moment në moment, ndërsa cilëson shumë të rëndësishëm faktin që po bëhen shumë sekuestrime.
“Prodhim ka pasur, Lazarati ka qenë një zonë e njohur e prodhimit. Është e pamundur që nga një moment në tjetër të ndërpritet. Pasi sasia ka qenë e konsiderueshme dhe nuk mund ta zhdukësh nga një moment në tjetrin.
Sipas të dhënave të Guardia di Financa, prodhimi është në sasira të konsiderueshme por është e rëndësishme që falë hetimeve bëhen dhe një numër i madh sekuestrosh, si në ujrat e kanalit të Otrantos ashtu dhe me destinacion Lecen.
Do kërkojë një ndërhyrje shumë të gjatë për të cuar në pakësim, nuk mund të mbarojë nga momenti në moment. Besoj se rezultat i mirë janë sekuestrimet, do të thotë që ka një bashkëpunim shumë të rëndësishëm dhe skuadra investigative e përbashkët po ia del.”- u shpreh ish kreu antimafias italiane.
