Inxhinieri Agim Seranaj, zëvendësdekan i Fakultetit të Inxhinierisë së Ndërtimit ka thënë në “ABC-në e mëngjesit” se është e kotë kalimi i netëve nëpër makina. Nëse pallatet e larta nuk kanë çarje të mëdha, dëmtime serioze, por plasaritje suvaje dhe i kanë rezistuar më së miri tërmeteve, nuk ka asnjë rrezik të kthehesh në to.
Lëkundjet mund të ndjehen, por rrezik nuk ka, veçanërisht në Tiranë.
Por, inxhinier Seranaj thotë që edhe në Durrës 80 përqind e banesave janë të jetueshme, përfshirë këtu pjesën dërrmuese të banesave në ish-Kënetën e Durrësit.
Ai ka thënë për Durrësin: “Durrësi është zonë sizmike 9 ballë, ka edhe zona 8 ballë. Ky tërmet ishte pranë tërmetit të projektimit apo parashikimit që do të thotë, nëse vlerësohet 8 ballë i shkallës Merkal, që mat dëmtueshmërinë, do të thotë që për një shkallë Merkal ose gjysëm shkalle jemi pranë tërmetit të projektimit. Varet sipas zonave, por maksimumi është 9 ballë”.
